| 感恩月已經踏入了第二個星期，每日寫下三樣感恩事項係小組其中一個活動之一。 其實自己之前都有做過，可惜，做事三分鐘熱度嘅我，總係未將呢個行動變成習慣，所以我要感恩，因為神俾我呢個重新開始嘅機會。 原來，當提醒自己要多留意身邊發生嘅事情時，發現要感恩的事項的確好多，感謝神！ 我要感謝神俾我有生命氣息，去享受我嘅生活，去面對不同方面嘅挑戰！ 我要感謝神藉唔同方式向我說話，堅定我所走嘅路，並陪我行每一步！ 我要感謝神賜我家人、朋友、弟兄姊妹、好好嘅同事，愛我、關心我，喺我軟弱無助時，給予我鼓勵和支持！ 我要感謝神俾我有勇氣去面對地獄班嘅學生，亦感謝神俾我睇到佢地微小嘅改變！ 我要感謝神俾我有天堂班嘅學生，帶俾我無限嘅歡樂！ 我要感謝神教我珍惜所賜我嘅一切，教我知道有呢一切都唔係必然！ 感謝神！ |
| |
| 果然被關公批中咗，佢收到地獄班的投訴，地獄班的學生要求見校長！！ 哈…原來我喺佢地心目中真係咁差，要直接向校長反映…從來都唔覺自己係一個好好的老師，但自問都唔係一個太差的老師，起碼我的實習學生話俾我聽我唔係呀？但點解嚟到呢到就會係咁？ 的確，我唔識教佢地，我對住佢地會緊張到講錯嘢而自己唔知，佢地投訴都有理由的，但真係我一個人的錯嗎？我可以投訴的嗎？唉…又要阿head睇關公的得戚樣，點解我咁唔爭氣？？ 逃避的念頭一次又一次的出現，希望校長唔俾我再教呢班，揾過第二個嚟代我，又或者我自己辭職唔做，但我要感恩，無論幾想逃避，但我仍然想做老師，教書繼續係我的理想… 我仍然要感謝神，俾我喺第一年就經歷地獄班，我相信呢班一定唔係最惡劣的一班，若果我仍要教書，我一定唔可以逃避呢班學生！我要面對你地！！我要去愛你地！！！！ 謝謝各弟兄姊妹、朋友俾我發洩，謝謝你地的安慰，亦要感謝神賜我一個可以安心獨處同平靜自己的地方… |
| |
| 今日係心情放假日，因為唔使上堂，最重要係唔使上地獄班！！ 今日改天堂班的功課時，其中一個學生喺佢份功課到寫俾我，話佢終於可以自己做完份功課，唔使靠人，好有滿足感！！睇到呢段文字，我嘅滿足感一定唔比佢少！滿足，唔單單因為佢喺會計得到滿足，更因為佢願意同我分享佢的滿足同喜樂！！真係好開心呢！！感謝主，喺我每次最迷惘失去自信時，就會俾我最體貼的鼓勵，令我重拾信心！！！ 至於地獄班，我幾時先可以拆毀自我保護的圍牆？我幾時先可以去用對天堂班的心情去對佢地？我要努力！！ |
| |
| 我得嗎？我真係得嗎？我冇晒信心了…係我唔好嗎？ 我唔要俾你睇死呀！！ |
| |
| 疑人勿用，用人勿疑，又疑又用，何必呢？ 你係唔信我，就唔好俾我教啦，俾得我教，就唔該唔好質疑我的能力！！！ 一次又係咁，兩次又係咁，想點喎？ 我點唔識教都好，都會識教過你！！你都冇睇過我上堂，憑咩質疑我的能力？暑期班收咗的evaluation form，你唔會睇下的嗎？你係唔信我，就索性唔好俾我教啦！！你信個連ed都冇讀過的人，點解唔可以信我？莫非就係因為人地個1st hon嗎？ 我係鍾意教書呀，但係唔鍾意俾你地攞嚟攝位用呀，揾我頂唔係因為信我教得到，只係請唔到人？我唔係籮底橙，點解要咁對我？ |
| |
